حقيقة !! ça fait mal

الى محبي تونس ...

الى من آلمتهم رؤوسهم...

الى الوطنيين الكرام ...

الى الحراقة الذين هربو من الذل و الحقرة ...

الى الجامعيين والاطارات الذين قُتل ابداعهم في عقولهم ...

الى البطالين اصحاب الشهادات العليا و الثقافات الواسعة ..

الى المواطنيين البسطاء المغرر بهم ..

الى من يتكلمون ليلا نهار عن حال بلادهم ..

الى النساء الشريفات اللواتي لا يرضين بمبادئ غير مبادي اصالة بلادهن ودينهن ..


امّا بعد...


في صغري عندما قرأت قصّة ''أليس في بلاد العجائب '' كنت اتصور ان اليس تعيش في تونس وربما ان حالفني الحظّ سألتقيها في الطريق وستصبح صديقتي...كبرت وشاب الرأس ورغم انّ حلمي بملاقات الحبيبة لم يتحقق الا انّ لي الشرف اني واحد من عشرة ملايين ممن يعيشون في بلد العجائب والمعجزات...


والحمد لله.



في الشتاء يتحقق حلم الاطفال بالسباحة في برك الماء التي خلفتها الامطار وفي هذه السنة بالذات في صفاقص تشارك الصغار والكبار في السباحة واللهو بالسيارات العائمة.
في بلد العجائب لا تتفاجئ ان شاهدت مواطن محّلق مع هبوب ريح صرصر عاتية طبعا تعرفون ان بلدنا خضراء والاشجار في كلّ مكان حتى ان جعلنا لها عيدا...امّا الاب فعيده طور الدرس

بلدنا مازالت بعض الاسر تحلم بحنفيّة ماء وخيط كهرباء وطريق معبدّة عوض المشي وسط ''ظلوف الهندي '' والافاعي للوصول للمنزل...استغربت من تسمية هذه الاماكن بمناطق الظّل في نطاق مشروع 26ـ26 ولكن الان عرفت انها تتمتع كلها بظلال الهندي والسدرة...اما بقية المناطق فهم من اشعة الشمس يعانون.


في بلدنا تنفجر النافورات في الصيف من تحت الارض في منظر رومانسي جميل ولكن المشكلة ان هذه البالوعات اقصد النافورات ليس لها موعد محدد للانفجار ولكنها تبقى معجزة فريدة.
كذلك مواطنونا فهم مميزين...كيف لا واجسامنا تعتبر مصانع للسكر ورؤوسنا دائما '' ضاربها الدمّ ''.
بلدنا دائما شاب ولن يعجز...منذ استقالاله وهو سائر في طريق النمو و لم ينموا بعد ...


نحن نكتب ونسهر الليالي نخربش...ليس نقمة ولا كرها ولكن غيرة على بلدنا...


حقيقة !! ça fait mal


سافي مال كي تشوف راجل كبير يجري على الدار...
الخمسة متاع الصباح يجري على ولادو يجري على الدار
سافي مال كي نشوف الكار هربت بيه نورمالمو في عمرو هذا هي اللي تخدم عليه...
سافي مال كي نشوف مرا كبيرة تخرج في الليل تمسح وتسيق في بيرو المدير
سافي مال كي تتمزبل بيه العروفات نورمالمو راهي في الحج واقفة في عرفات
سافي مال كي نشوف شباب انحرفوا للاجرام..سرقوا وبركاو..ومشوا في طريق الحرام...
سافي مال كي تشوف الحاكم للدار صدم...قدام حيرة البو وقدام بكاء الام
سافي مال كي تشوف البطالة ماشية وتزيد...سافي مال كي تشوف ديبلومي يسكر تحت الحيط
سافي مال كي تشوف في جيبوا فرك لا نورمالمو..شاد بلاصة من البلايص بيديجي...
سافي مال كي تشوف معاق يمشي على العكاكز...هو يتطايح وانت فوق الارض راكز...
سافي مال كي تشوف مرا راجلها بطّال...في النهار يسكر وفي النهار يتفرج على الاخبار..
سافي مال كي تشوف ولادوا من غير حليب...فلوسو ماشية في الشراب بوهم الكوليك...


حقيقة !! ça fait mal

كي نشوف بعض بنات بلادي


تحب المظاهر وتحب التصاور وتحب الكلاس...
تحب السهرية في البواتات وتحب الكاس...
تحب الرستوران وتشرب كان الفان بلون...
تحب تشطح فوق الطواول وتبرد بالقلاسون
تحب الشيخة وتحب الكراهب والسهريات
معروفة كالدينار في تونس،سوسة والحمامات.
بين البواتات والوتلا باس بارتو....

تحب تعري وتوري باش تكثر علاها العينين...
تحب الفلوس واليكس والكلاس...
في دارهم تاكل رشتة مع الغنيا تاكل القلاس...
دارهم على قد الحال..الام تخدم والبو مخنوق...

تحب وتحب وتحب وتحب وتحب وتحب وتحب...

تخرج في تاكسي وتروح في البيام
تحب تاكل الدنيا وماتكلش اللي كتب...
تحب تطير لفوق وتنسى خطوتها...
تبعت مشيت الغير وخرجت من قشرتها...




حقيقة !! ça fait mal

ça fait mal

ça fait mal

ثورة بهيّمْ ماتحملشْ....فانتحر

الناس الكل تعرف خميّس...بهيّم صغير في العمر وخدّام وسبّاق وجرّاي ومايكلش الشعير...ويمكن زادة خاطرو وهرة على بقيّة البهايم،ما تفهم شئ...لاجاء حصان لا جاء فرس...يمكن شركي وبوه عرّس في الضلام وما ثبتش مليح في اللي عرس بيها...المهم هو بهيم فريد من نوعو وذكي برشة وتصرفاتو متاع واحد متشبع بالثقافة الانسانية واذا ماجاش عندو وذنيه طوال شويّة كيما انتان تلفزة والا خشمو مدبب ومناخيرو واسعين برشة تنجم تقيّل فيهم حمامة...راهو اللي يشوفه كيفاش عايش يقول انسان...والا يقول احنا بهايم...وانا واحد من الناس نتشرف باش نكون بهيم كيما خميسّ ،نعرف انو صعيب الواحد باش يكون حمار ولكن ما احلى انو الواحد يكون عقل في راس بهيم.
ما نطولش عليكم...سي خمّيس هذا وصل لمرحلة متقدمة من الوعي بقضايا بني جنسه كل يوم تشوفه يحوس من بلاصة لبلاصة ويمشي في الشوارع ويسقسي على احوال والوخيان البهايم ويواسيهم واللي يجيك عجب انو ساعات تلقاه مروّح لعشية للمربط متاعو وشادد بفمو جرايد ومجلات قديمة مصور عليها تشي قيفارا وغاندي ومالكوم ايكس وجمال عبد الناصر...
اللي عجبني في خمّيس انو على عكس الزواولة اللي يعدو شطر عمرهم جيعانين وهو ولا مرّة جاع...اي نعم...خميّس وين تخطرلا يمشي يرتع في الحقول والبساتين وياكل اللي يحب...بتنفس حرّية...حتى انو مرة اشتهى بعض النوار والورد...غار على الحديقة العمومية بوسط المدينة وتفنن في القضم والهضم...ملا بطنه وزيّن البليصة بالروث وخرج امّا نحنا وقت الواحد فينا يجوع يموت بالشرّ...نبدو نشتهو في تفاحة والا تمرة ومانحصلوهاش...تتصدر للخارج ويشبعو فيها ولاد العكري...البهيم مايكلما حتى حد فلا القانون ولا الأعراف تمنعنو من ممارسة حريته...
سي خميّس بحكم انو ديما في المدينة تكونت عندو فكرة كبيرة على البشر وطريقة عيشهم وعرف الزواولة ...وعرف انو اغلبهم مظلومين ومغبونين وحقوقهم مهضومة ومامحصلين شئ كان المذلة والنبزيات هوما يدفعو ويشقو ويموتو...والاغنياء ياكلولهم في عرقهم ويحرموهم حتى من حق العيش باسم القانون...معناها بهايم آدميّة تعمل للاسياد يركبو عليك وقت اللي يحبو وتاكل الا القليل واذا تكلمت او حتي نهقّت العصا تهريلك جلدك.
في يوم قرر سي البهيّم باش ينتقم للبشر ويضحي بعمرو على خاطرهم...وقف امام موقف لسيارات الفاخرة للمستكرشين التابعة لاحدى ونفخ صدره ومدّ وذنيه وعدّل وقفتو وبدا ''يصكّ '' فيهم برجليه حتى سواها بالارض...وبدا يدور في المدينة ويكسر ويخرب في ممتلكات اللي يعرف انها تابعة لواحد استغلالي وضالم وفي كل الشوارع خرجو المواطنين وراه يناصره يصفقو ويهللو ويدعو في ربي باش ينصر سي خميّس اللي عمل عمايل يتمنى يعملها كل واحد فيهم وهو يمشي هاز راسه لفوق وينهق في نهيق متواصل يعبر على الفرحة والسعادة متاعو...كبهيم حر...حر...حر...
وتعدت الايام والليالي وخوكم خميّس البهيّم يستنى وانو الاوضاع باش تتصلح وتتحسن بعد الثورة اللي قام بيها على خاطر الزواولة ولكن بالعكس الشئ قاعد يزيد على قدّام والخسائر الكل خلصت من ضرائب جديدة وزيادات في الاسعار...


تقهر بهيّم مدينتي وما تحملّش اللي صاير في البشر...فهرب...وانتحر

وراس الحنينة لما ننسى الافريقي والترجي والبطولات الاروبية...

هيا قلنا السلام عليكم


الواحد آش باش يقول؟


الشفاعة يا رسول الله...كاس العالم وعالم في كاس...جرايد،قنوات،اذاعات....الناس الكلّ تتنفّس كورة...هيّا فقت الصبّاح قلت خلّي نساهم مع التوانسة في مضغ وتلويك لوبانة الكورة، وبالمناسبة هذي نوّجه تحّية لشعبنا المزطول والمنتشي، محبّ التكوير حتى النخاع ونقلوا اللهم صلّي على النبي وعيني ما تضرّك يا شعبي العظيم...


اني خوكم حسّاس شويّة ومانطيقش...مانحبّش نشرب ماء السبّالة، وين نشوف فريقنا الوطني يكوّر والشعب مصاب بهستيريا في الفيراج يشجّع وعاطي ماعنده،قلبي يوجعني ونحسّ بالقلق، بالفقر، بالجوع، بالبهامة، بالحقرة وبالستوكيّة...



مشجّع الدجاج الوطني اني ريته...
يدّهشر مضّيع مسربهْ وثنيته...
جروده طبعة مشرّكه سوريته...
ثاقل لسانه وغوفته ملويّة...
فمّا اللّي جابوه في برويطة...
خِدْروا ارْكابه فريسْته مرْخيّة...


الفيراجيست التونسي يا حليلي منه...
ملكِّد هلّك عياله ويغيب يتخبى على اللّي يساله...
الماء والضو قصوا السبّالة...
الملّاك موش خالص،يشري تساكر ويخلّص على الرجّاله...
على خاطر ماتش لا يحير لا في العشرين لا في الميّه...
يا خويا آش يلزّك؟؟؟...
كوره مدوّرة للهلاك تهزّك...
تطيح قيمتك ويرخص غلاك وعزّك...
خوذ نصيحتي وكلمتي رسمية...
الكورة مشومة للغريق تهزّك..
خوذ النصيحة تفيدك...
تبّع طريق الخير ربّي يزيدك...
صلّي صلاتك،للصلاح تعيدك...
تعدّي حياتك ديما في احسن هيئة...


المهّم ما نطولش عليكم...موجة لهبال هالنهرات ما اصابتش كان المواطن التونسي، العالم الكل يمدح وينبّر ويصفّق ويبندر للمنتخب الفولاني ويسب ويلعن في المدّرب العلاني...حالة مكربة وميزيريا كلبة...وعلاش لا في ضلّ تحرر فلسطين والسلام في العالم...خلّي نعملوا كاس عالم لكرة القدم النسائية وهكّا نخلصوا ذمتنا ونوفوا بوعودنا ونعوضولهم على الايامات اللي تعدت واللي تحرموا فيها من حقوقهم ومساواتهم بالرجل...وبالطبيعة تعرفوا اللي الكورة النسائية عندها طعم خاص المقصات الهوائية والكنترول عنده ابعاد اخرى...


جامعتنا الموقرة تشجّع على الميوعة، وخلي من الكوارجيات يلبسولنا كيما يلبسوا لاعبات الكرة الطايرة وخاصة هاك الشورت القصيّر...وناقص كان كل واحدة تمركي هدف تنحّي المريول وتشتطح على البومزيود


شبيكم تشوفوا فيّا على جنب؟!


ناقصنا كان الجامعة تعمللنا فريق لكل مدينة...وتزيد تكلّف بعض الشعراء باش يعصرولنا مخاخهم ويبدعولنا في غنّايات فيراج مفّوحة بشوية جهويات وكلام زايد...تي هو الشعب يمشي للملاعب يوم لحد : اولا باش يحرر شوية كبت وينحي ستراس خدمة اسبوع كامل ويلعن ويسب ربّي ...
وثانيا باش يتبع الماتش...



ياولادي تزيد تربخ ويحلى الجوّ اذا الصحافة وحنبعل تزيد تعمللنا روبورتجات في حجرات الملابس...وراس الحنينة لما ننسى الافريقي والترجي والبطولات الاروبية...


ملّا وهرة يا جامعتنا...ما احلاك



ويبقى حديثنا قياس وسلامي عليكم يا اعزّ النّاس.

سي نورمال كي تخطرلي... وفي تونيزيا سات نفجّر روحي

نحب نحكيلكم على خوكم الحنشّ متخرج عندو 3 سنين وتحصل بعد مسيرة دراسية موفقة على شهادة استاذية وبالرغم اللي السيّد هذا كان قرّاي ومعدلاتو طيّارة الا انو ماعندوش البخت ولا حيطيست يعمل ستّة وستين كيف...
الايام تتعدى وشئ ما تغيّر...كيما العادة فاق الحنش يمشي للسبّالة ويغسل وجهو بالصابون المعطّر ويثبت في شعرو فمّاش شيبة طلعت جديدة...بالرغم ملي عمرو صغير ومازال شباب الا انو شاب...والشيب مركا ضربة جزاء في الدقيقة 80 وماعادش وقت للتعديل...يعمل شويّة جال يركح بيهم شعراتو ويرجع للغرفة متاعو يقعد على البيرو ويحل الاورديناتور


ملّي كلاها في عظامو وضرب البطالة وحياة الحنش مقسمة بين القعاد على التروتوار قدام بيرو الشغل وبين الانترنات ولعشية يعمل كاس تاي في قهوة الحومة يوسع في بالو مع اصحاب الحيط...
المهم مانطولش عليكم اول ما حلّ منتدى تونيزياسات وعمل طلّة على العام وخربش شوية هراء في هداري انسايدر واطمن على الجماعة ومن بعد تعدى بحذى خوه الباتشينو وبولو يبربش على الكونكورات...حل الاذاعات وماخلى لا موزاييك لا الشباب ولا الجوهرة ولا صفاقص...شئ ما لقى كان شوية برامج متاع برجك اليوم وباش تلتقي بحبيب القلب وفلوس باش تجيك ليوم وتليفونات تصبّ صبان تلوك في خرّافة غناية البلطي وصور لبنات وفلمات ودرابوات وخرفي يا مباركة...
ضربه الكساد والقلق وقرر باش يحل شوية فن من الاورديناتور على كيفو خير ما تجيه جلطة ترزيه في عمرو...


وبالطبيعة من غير ما ينسى الفايسبوك ماهو من مديدة عمل كونت وقرر باش يبحث عن فتاة احلام اروبية فماّش ما تخرجو لبرّة ويرتاح من البطالة ،طبعا تعرفوا ان اغلب الشباب هذا هو هدفهم من الانترنيت



الشباب يا غالي شاب وماعاد يحتمل الاوجاع
مع تسهيلات التوب نات هرب الى الانترنات
واصبح يمضي الساعات يتكلم ويعبّر من وراء الزجاج
بعد ان ضاقت بهم دور الشباب و المنابر والساحات
يبحث عن فتاة الاحلام من بلد العكري والعم سام
شباب همّه البحث عن عمل او الحرقة على الانترنات
بعد ان يئسوا من ايجاد السبيل

فما وجدوا الا الانترنيت طريقا والشات بديلا ودليلا...
فما عليك الا بلوقا او بروفيلا
زينه بصور او ان شئت تسجيلا
تجد نفسك في المباشر مع اجمل فتيات العالم حسنا وتمثيلا
من اقصى بلاد العزّاب الى بلد العم سام
انك امام الكام
عين سحرية تحقق الاحلام
لذا استغل الفرصة ولا تكثر من عبارات اللول والوزّ
فانها تعبير عن شعور حائر ومهتزّ
وظرفّ بائس وملتزّ

الانترنت تعبد عبدا ومن دون صلاة
بل جعلت الليل معاشا والنهار سبات
الشاتور...انسان بسيط وليس بصعلوك
ولكن البطالة وصعوبة الزواج في بلاده
جعلته تائها في بحر البادو والسكايبي والسكايروك
اخذ الشات من الذكور كما اخذ من البنات
فاذا كان غرض الذكور منه اروبا
فماهو غرض البنات؟؟؟

اما الشئ اللي يحشّم في الفايس بوك انو الشعب التونسي وصل لدرجة كبيرة من الوعي وخاصة مع تهاطل الاستدعاءَات على الحنش باش ينظم لمجموعات وقروبات ينشؤا فيهم كمشة فروخ بحجة التحرر والحرية ومحبي الزطلة والتوقير وبربي نلقاش عندك ميّا والا سيقارو...
برجولية غلبو على خوكم الحنش هالفروخ وبالرغم من حجب قروباتهم الا انهم شئ ماحبوش يفهمو رواحهم...
على فكرة انو الحنش من المعارضين لسياسة الحجب ويكره عمّار ككرهه لبني صهيون...يا خويا علاش اش عمل الشعب باش تدزّ عليه بالحجب؟؟؟ بالك جاي يساسي فيك...سايس خوك...


وخلّي عاد من الالعاب والخزعبلات اللي شطر الفايسبوكين التوانسة مشاركين فيها ولعلّ اهمّ حاجة جبدت انتباه لحنش لعبة "الفارم فيل" اللي تزرع فيها الفقوس والبطيخ والطماطم...وربما هذا السبب اللي خلى شبابنا يهرب من الفلاحة بارضنا ويشد فلاحة الانترنيت...شئ يدوّخ...كان الدنيا دنيا راهو حققنا الاكتفاء الذاتي في الخضروات موش نهربو في البطاطا من ليبيا والجزائر


آخر طلعة قبل بنهرات فمّا واحد من الجبورة بعث جواب فايسبوكي للحنش يدعوه باش يخربش ضمن مجموعة من حاملي القنابل الموقوتة وصواريخ سكوت ورشاشات كلاشنكوف قال شنوا يناصرو في الاسلام ويجاهدو افتراضيّا...المشكلة انو الحنش خاطيه الحكايات هذي وخاصة كيف تكون اغلب ركائزها بدع واكاذيب من قبيل اللي مايسوكّش كل يوم مايدخلش الجنة واللي يضرب كافر حتى ماعمل شئ يجازيه الله بالجنّة...
فرد عليهم الحنش بجواب مضمون الوصول :

السلام عليكم ورحمة الله
مانيش باش نسألك كيفاش من دون خلق ربّي الكل ما خطرلك كان انا باش نساهم معاكم في كوخكم الافتراضي للجهاد...اما يارسول الله كي انت تنادي بالجهاد المسلح ياخويا سيّب الفايس بوك للي يجاهدو بالقلم لنشر الاسلام وتوعية الناس وبرّا ادخل اللخلا وجاهد!!!ملا حالة و ملى ميزيرية كلبة...توى هذا آش عطاك مخّك؟؟؟ بالله قولي ريتش مرّة نصراني والا ايهودي يعمل في عمايل كيفك؟؟؟ وكي انت تحسب في روحك متديّن وغيور على الاسلام قلّي آآآش تعمل تصويرة المرا اللي شطرها عريان في قائمة الاصدقاء؟؟؟ تجاهد والاّ تكوّر وترّكح بالصدر؟؟؟
بصراحة الشفاعة يارسول الله...بجاه ربّي ياصاحبي راهو الشئ هذا ماقالش بيه ربّي وكي تحب تجاهد افتراضيا ونعاونك باللي نقدر عليه من مقالات سيّب عليك من الاسلاموفوبيا وبرّا خويا حلّ قروب حطّ فيه ايات قرآنية واحاديث نبوية وشوية خطب توعي بيها الناس موش تدخلهم في حيط بشوية خزعبلات...
وكان ماعجبكش كلامي نتمنى انك ماتتهورش وتتطرشقلنا في الفايسبوك...براس الحنينة اتفجّر بعيد...
والسلام.


هكّا كل يوم يتعدى في الانترنات يشوف فيه وخيكم الحنش العجب...
يتصدم ويضربا الهم...
على عمار وجماعة فجّرني اللي فضحونا بين الامم...
وقاللكم خلّي نمشي نرقد ونتخمد...
سي نورمال كي تخطرلي...
وفي تونيزيا سات نفجّر روحي...

فريب وخنّار...والعيشة فلّ...

مايفيد ملام...

مايفيد كلام...

مادايم والو...

مادايم كان وجه ربّي...


يا حسرة على عيشت البلاد...بعد الحنّ والعزّ والصحبة...توا في شمبر وحدو...قاعد على الاورديناتور...ترشّف رشفة من القهوة الكحلة...هزّ راسو للعالي...تذكر عيشتو في تونس...

الايّام الكلّ كيف كيف...يبدأ الاسبوع من نهار الاثنين حتى للسبت ونفس البرنامج...الصباح في بيرو الشغل والقايلة وفي الليل في تونيزيا سات والعشويات في القهوة...حتى نهار الاحد عادي ونفس لحكاية بالنسبة لخوكم الحنّش...
يقوم مفجوع من صوت الموبيلات متاع الكوشة اللي توصّل في الخبز للعطارة...وتزيد تخلط عليه موبيلات اللقّام....لآآآآآقمي.... مبعد يتعدى اللي يبيع في الفريب....فرييييييييييب....لا حول ولاقوّة الا بالله...يجبد خوكم الحنّش سيقارو كريستال معوّج ويتكيفو على الخوا...
ايه وبياع الماعون،شبييه لتوا ما جاء...هاهو جاء...يالي عندو حوايج قديمة...يالي يحب يبدّل، يسمع باب دار حلّومة اللّبة يتحلّ،صوتو يفيّق الموته في الجبّانة...كيمة العادة يمكن مخرجتلو صبّاط قديم باش تبدلو ببانو والّا كيسان بلّار...
الهمّ لزرق...الواحد معاش منجّم يرقد في هالبلاد...اما اكاهو الخبزة مرّة...
آش باش تعمل يا حنّش...آش باش تعمل...هيا برّا للسوق،اليوم احد مايقرأ حد راهي حافلة لبلاد...يوصل للسوق اما كان قعد في الحومة خير...نفس الحكاية هرج وصياح وسبّان...فريييييب ،القطعة بدينار ...بلآآآار....وموكروفون في الجلغة وتعالي يا مادام اشري البلار...
وحتى المارشي هذا ينادي منه ولاخر من غادي...حووووت الكيلو بالفين، يازوالي وكلّ صغيراتك...فقووووس...طمآآطم....
عمل الحنش دورة صغيرة وخرج من الباب الثاني للمرشي...يلقى بياع الملسوقة وطفلة تبيع في خبز الطابونة ...يا صاحبي بالحق الخبزة صعيبة ومرّة ،الناس الكل تعاني...قال برة نعمل قهوة وسويقرات نعدّل بيهم مخيّ ...دخل لقهوة وشدّ بليصة تعمل الكيف...يشوف في السرفور جاي شاد في يدو طبق مليان بالقهاوي ويحطها على الطاولة اللي بجنبو...يا حسن اشنوا ديما ناسي الماء؟؟...يجاوب السرفور على الحريف بكلمة زايدة قد راسو...يعطيك....ويزيد الحريف مايسكتش ويرد السب...يعطيك....على....في....يا...
يا والله احوال...يستلبس خوكم لحنش ويقرر باش يبدل القهوة ،الجماعة تحكي من الحزام اللوطة...
يتعدى على قهيوة يشوف فيها جماعة الجوكينغات...ايه ماله هاذوما يا سيدي للميعرفهمش جماعة البيروات والمتوظفين والناس اللي لاباس عليهم...
يشد طاولة ويبقى يشوف في عجب ربّي...المشكلة انو في بلدان ربّي الكل...الزي الرياضي يتلبس لممارسة الرياضة الا في بلاد الفرح الدايم ولا زي متاع شيشة وقهوة...وخلّي عاد من الحكايات اللي يحكو فيها...كلها على سكرة البارح وكل واحد يفتخر وين عمل كعبات البيرة في السامدي سوار...
يتلفت الحنّش على اليسار يشوف جماعة شادين جرايد...يثبت مليح يلقاها الكل لابراس...لا حول الله...حتى هي تابعة الزي متاع القهوة...
ملّا حالة مكربة وملّا عيشة...الواحد تقولش عليه عايش في زوز بلدان...ميزيرية وفريب....مظاهر وتبهبير
رجع الحنّش للدار...حلّ الانترنيت...وبدا يخربش على هالخنّار...

هذي هي بلادي...اما والله فريب ومقرونة ومعدنوس....نصف خبزة طابونة في بلادك ولا خبزة في بلاد الناس

أعشق عمري لأني إذا مت ، أخجل من دمع أمي

مرحبا بالاحبّة...

في عيد الام اكتب كلمات منثورات...تقاطرت معها دموع قلبي...
يكذب عليك في هذه الدنيا ان قيل لك ان هناك شئ اثمن من والديك...وخاصة الام...هي حملت بي...هي ولدتني...هي ربتني...
الام نعمة من عند المولى...
حقيقة لا اقدر على الكتابة رغم ان صورة امي على المكتب امامي...لاول مرّة يخذلني القلم...ربما حالة الاغتراب...ربما اشتياق لا اقدر ان اخفيه او اظهاره...
نجري وراء الدنيا وتركنا امهاتنا...ندرس ونشتغل ونتزوج ونبتعد ونتركها...نتذكرها فنهرول لارسال بعض الملاليم مصحوبة بخجل وندم...نهاتفها بضع دقائق...نزورها عندما تمرض ونمضي بحجّة ان الدنيا صعبة والخبزة مرّة...
لو كان ماتت ندفنها ونبكيها اياما معدودات...
فقولوا لي...من منكم لم يغضبها يوما؟ من منكم لم يصيح في وجه امّه؟ من منكم لم يبكيها في مواقف؟
لا تقولوا لي انكم ملاك ابيض...
انا اخطأت كثيرا معها فادعوا المغفرة من الله...وختمتها بتركها والسفر...
تحية لامي ولكل ام...


الولدة تبعث وتقولي لوحتني يا ضنيني
لا فاد عطفي ولا حنّي

لا نسيت لا لوحتك...يمكن نكون صحيح ماريحت
ويمكن نكون في غيبتي جرحتك
ويمكن ماني قريب ما متهني
بيني وبينك في خاطري نندهلك
يــــــــــا رب ريح بالها طمنّي
يــــــــــا رب زيد في عمرها وارعاها
باش نرجع وتحس ام الحنْ بحنّي..
ليّام ما بتصدف الا برضاها
عاث الزمن بيا وزاد ظلمني

لا تظلميني يمّة..
لا تظلميني يمّة ولا تعيشيني في مهالك ظلمة
يشهد عليا الله واسع علمه..آش داسلك في القلب وآش متمني
ياسر عليا الوقت..وانتي وظنّي
ياسر عليا هكّة..ياسر عليا هكّة..
ظلم الوقت ودروبي خطت السكّة
لي قلب من داخل كلاته حكّة ولا نقد حكّه ولا دواء ذهنّي
طامع رضاك عليا وبرضاك بركه ننجا
آآآآآآه يامّة...ارضي عليا يمّة

محروم منّة ومنّة والله محروم
ولدك سلك دروب ما رحمتني...
آآشلزني نطيّش غِطايا الدافي وحدفت روحي للصقيع كبّلني

ســــــامحيني يمّة...مكتــــــوب يمّة
هربت من كساد بلادي...فديت من الشمايت والبطالة تغنّي
وفي اللخر راني مجبور ماني عادي شديت جرٌت الرحيل هزمني
غيراصبري يمّة...وماتقولي
الصبر ديما يساندك في همّك
اني عارف هولك نتيجت هولي
اخطاك من كثر النكد واوجاعا
اصبري غاليتي ويـــــــــارب تعطيني على قد نيتي
تتعدى ايام البعد ويـــــــــارب تعطيني على قد نيتي
يـــــــــــارب عــــــــــــاوني
وبارك خطايا بشورها عاويني
يكون حن والدتي منارة للثنّية
اخر طريقي رضاك يا غاليّة

والله يمّة من المكتوب ماهو منّي

انا من سلالة المنقرضين

انا من سلالة المنقرضين...


نحن العرب قوم بائس مهدد بانقراض...فأنا كبائس من النوع الرفيع فهمت انني منقرض لمحالة،لست ديناصورا ولكّني عربيّ كتب على جبينه...اصمت واركع ولا تتكلم فانت بائس...
احيانا اتساءل...لماذا لا يتمّ قبرنا جماعيا وانتهى الامر...فهكذا سيوفر هولاء الناس ثمن الوقود والذخائر والقنابل التي يشترونها ويصنعونها...
ولكن...لو انقرض العرب فمن سيلعب ويعوض دور البائس في تراجيديا العالم؟...
على من سيشفق وعلى من سيتأسى؟
على من ستطبق القوانين والتجارب العسكرية؟
اظنّ ان هؤلاء يعلمون اننا امّة منقرضة لا محالة فلا يهمّ ان حوصرت غزّة او قذفت على رؤوس الفلسطينين الاف الاطنان من القنابل الفسفورية...
الان حلّ علينا موسم غزّة...ولكن هذه السنة جاء خافتا لم يقتل فيه سوى العشرات...
فامريكا اعيتها الحروب وانقت الكثير على غزواتها...واسرائيل تحاصر وتعرف انها هكذا تقتل بدون خسائر...ومصر تبني جدارها وتنافق من اجل توفير الفول والطعميّة لشعبها الفقير...والخليجيون اعينهم احمرّت وتعبت من الجلوس وراء الحواسيب والتلفزات لمتابعة اسعار واسهم النفط والشركات...اما المغرب العربي فهو غارق في الكرة والغناء...
الاخبار معتادة...
فنان يغني على غزّة وروتانا تجني الاموال...
قمّة عربية طارئة...
قروب على الفايسبوك يدعوا لجمع مليون توقيع للتنديد...


راودني سؤال...

ماذا لو انقرض العرب وسحقوا عن بكرة ابيهم؟؟؟

لا شئ...لاننا في الحقيقة منقرضون!!!!