سي نورمال كي تخطرلي... وفي تونيزيا سات نفجّر روحي

نحب نحكيلكم على خوكم الحنشّ متخرج عندو 3 سنين وتحصل بعد مسيرة دراسية موفقة على شهادة استاذية وبالرغم اللي السيّد هذا كان قرّاي ومعدلاتو طيّارة الا انو ماعندوش البخت ولا حيطيست يعمل ستّة وستين كيف...
الايام تتعدى وشئ ما تغيّر...كيما العادة فاق الحنش يمشي للسبّالة ويغسل وجهو بالصابون المعطّر ويثبت في شعرو فمّاش شيبة طلعت جديدة...بالرغم ملي عمرو صغير ومازال شباب الا انو شاب...والشيب مركا ضربة جزاء في الدقيقة 80 وماعادش وقت للتعديل...يعمل شويّة جال يركح بيهم شعراتو ويرجع للغرفة متاعو يقعد على البيرو ويحل الاورديناتور


ملّي كلاها في عظامو وضرب البطالة وحياة الحنش مقسمة بين القعاد على التروتوار قدام بيرو الشغل وبين الانترنات ولعشية يعمل كاس تاي في قهوة الحومة يوسع في بالو مع اصحاب الحيط...
المهم مانطولش عليكم اول ما حلّ منتدى تونيزياسات وعمل طلّة على العام وخربش شوية هراء في هداري انسايدر واطمن على الجماعة ومن بعد تعدى بحذى خوه الباتشينو وبولو يبربش على الكونكورات...حل الاذاعات وماخلى لا موزاييك لا الشباب ولا الجوهرة ولا صفاقص...شئ ما لقى كان شوية برامج متاع برجك اليوم وباش تلتقي بحبيب القلب وفلوس باش تجيك ليوم وتليفونات تصبّ صبان تلوك في خرّافة غناية البلطي وصور لبنات وفلمات ودرابوات وخرفي يا مباركة...
ضربه الكساد والقلق وقرر باش يحل شوية فن من الاورديناتور على كيفو خير ما تجيه جلطة ترزيه في عمرو...


وبالطبيعة من غير ما ينسى الفايسبوك ماهو من مديدة عمل كونت وقرر باش يبحث عن فتاة احلام اروبية فماّش ما تخرجو لبرّة ويرتاح من البطالة ،طبعا تعرفوا ان اغلب الشباب هذا هو هدفهم من الانترنيت



الشباب يا غالي شاب وماعاد يحتمل الاوجاع
مع تسهيلات التوب نات هرب الى الانترنات
واصبح يمضي الساعات يتكلم ويعبّر من وراء الزجاج
بعد ان ضاقت بهم دور الشباب و المنابر والساحات
يبحث عن فتاة الاحلام من بلد العكري والعم سام
شباب همّه البحث عن عمل او الحرقة على الانترنات
بعد ان يئسوا من ايجاد السبيل

فما وجدوا الا الانترنيت طريقا والشات بديلا ودليلا...
فما عليك الا بلوقا او بروفيلا
زينه بصور او ان شئت تسجيلا
تجد نفسك في المباشر مع اجمل فتيات العالم حسنا وتمثيلا
من اقصى بلاد العزّاب الى بلد العم سام
انك امام الكام
عين سحرية تحقق الاحلام
لذا استغل الفرصة ولا تكثر من عبارات اللول والوزّ
فانها تعبير عن شعور حائر ومهتزّ
وظرفّ بائس وملتزّ

الانترنت تعبد عبدا ومن دون صلاة
بل جعلت الليل معاشا والنهار سبات
الشاتور...انسان بسيط وليس بصعلوك
ولكن البطالة وصعوبة الزواج في بلاده
جعلته تائها في بحر البادو والسكايبي والسكايروك
اخذ الشات من الذكور كما اخذ من البنات
فاذا كان غرض الذكور منه اروبا
فماهو غرض البنات؟؟؟

اما الشئ اللي يحشّم في الفايس بوك انو الشعب التونسي وصل لدرجة كبيرة من الوعي وخاصة مع تهاطل الاستدعاءَات على الحنش باش ينظم لمجموعات وقروبات ينشؤا فيهم كمشة فروخ بحجة التحرر والحرية ومحبي الزطلة والتوقير وبربي نلقاش عندك ميّا والا سيقارو...
برجولية غلبو على خوكم الحنش هالفروخ وبالرغم من حجب قروباتهم الا انهم شئ ماحبوش يفهمو رواحهم...
على فكرة انو الحنش من المعارضين لسياسة الحجب ويكره عمّار ككرهه لبني صهيون...يا خويا علاش اش عمل الشعب باش تدزّ عليه بالحجب؟؟؟ بالك جاي يساسي فيك...سايس خوك...


وخلّي عاد من الالعاب والخزعبلات اللي شطر الفايسبوكين التوانسة مشاركين فيها ولعلّ اهمّ حاجة جبدت انتباه لحنش لعبة "الفارم فيل" اللي تزرع فيها الفقوس والبطيخ والطماطم...وربما هذا السبب اللي خلى شبابنا يهرب من الفلاحة بارضنا ويشد فلاحة الانترنيت...شئ يدوّخ...كان الدنيا دنيا راهو حققنا الاكتفاء الذاتي في الخضروات موش نهربو في البطاطا من ليبيا والجزائر


آخر طلعة قبل بنهرات فمّا واحد من الجبورة بعث جواب فايسبوكي للحنش يدعوه باش يخربش ضمن مجموعة من حاملي القنابل الموقوتة وصواريخ سكوت ورشاشات كلاشنكوف قال شنوا يناصرو في الاسلام ويجاهدو افتراضيّا...المشكلة انو الحنش خاطيه الحكايات هذي وخاصة كيف تكون اغلب ركائزها بدع واكاذيب من قبيل اللي مايسوكّش كل يوم مايدخلش الجنة واللي يضرب كافر حتى ماعمل شئ يجازيه الله بالجنّة...
فرد عليهم الحنش بجواب مضمون الوصول :

السلام عليكم ورحمة الله
مانيش باش نسألك كيفاش من دون خلق ربّي الكل ما خطرلك كان انا باش نساهم معاكم في كوخكم الافتراضي للجهاد...اما يارسول الله كي انت تنادي بالجهاد المسلح ياخويا سيّب الفايس بوك للي يجاهدو بالقلم لنشر الاسلام وتوعية الناس وبرّا ادخل اللخلا وجاهد!!!ملا حالة و ملى ميزيرية كلبة...توى هذا آش عطاك مخّك؟؟؟ بالله قولي ريتش مرّة نصراني والا ايهودي يعمل في عمايل كيفك؟؟؟ وكي انت تحسب في روحك متديّن وغيور على الاسلام قلّي آآآش تعمل تصويرة المرا اللي شطرها عريان في قائمة الاصدقاء؟؟؟ تجاهد والاّ تكوّر وترّكح بالصدر؟؟؟
بصراحة الشفاعة يارسول الله...بجاه ربّي ياصاحبي راهو الشئ هذا ماقالش بيه ربّي وكي تحب تجاهد افتراضيا ونعاونك باللي نقدر عليه من مقالات سيّب عليك من الاسلاموفوبيا وبرّا خويا حلّ قروب حطّ فيه ايات قرآنية واحاديث نبوية وشوية خطب توعي بيها الناس موش تدخلهم في حيط بشوية خزعبلات...
وكان ماعجبكش كلامي نتمنى انك ماتتهورش وتتطرشقلنا في الفايسبوك...براس الحنينة اتفجّر بعيد...
والسلام.


هكّا كل يوم يتعدى في الانترنات يشوف فيه وخيكم الحنش العجب...
يتصدم ويضربا الهم...
على عمار وجماعة فجّرني اللي فضحونا بين الامم...
وقاللكم خلّي نمشي نرقد ونتخمد...
سي نورمال كي تخطرلي...
وفي تونيزيا سات نفجّر روحي...