للبيع...اشري تربح

انا الممضي اسفله:



انا مواطن
عندي خبرة في التنسنيس ونقل الكلام اسرع من الارساليات القصيرة وعندي مواهب
كبيرة وقدرات عجيبة وافكار شيطانية حاصل على باكالوريا في التلوعيب
ومتخّرج من كلّية الدوّة الفارغة ومتمرّس في هزّان القفّة،ورثت عن جدّتي
التكمبين والتقطيع والترييش.
نكتب مليح ونخربش كل حين، مستعد نسّخر قلمي
لنقل اخبار المواطنين وكشف اسرارهم الشخصّية وتحركاتهم ،كجارنا الحيطيسّت
اللي نهار الكل وهو شاد حيوط الحومة يسب وتشكى من المسؤولين ويتهمهم بانهم
السبب في بطالته بعد التخرج والا الاوباش اللي يجتمعوا كل ليلة في قهوة
''سلّم نفسك '' ويبدوا ينبّروا على اسوام المواد الغذائية وعلى عدم دعمها
من الدولة وخلّي عاد من عمّار الحمّاص...هذا قاللهم اسكتوا...كل ما نشري
باكو فرملي باش نحرق بيه جواجيا يجبدلي على مشكل السكن...توّا هذا معقول؟!
يحب الدولة تسيّب المنتخب الوطني لكرة القدم وتتلاها بيه هو باش تسكنا؟؟؟
وزيد على هذا الكل اني نعرف اللي هو كذّاب كبير...الانسان هذا عنده خمس
سنين ساكن عند حماته خدّوجة اللفعة.
والشبيبة متاع الحومة نظنهم
يتعاونوا مع فرنسا يحبوا يرجعوا الاستعمار فمّا مرّة وانا نتفرج على طرح
شكبّة في القهوة سمعتهم يحكوا على فرنسا وبانبهارهم بناسها اللي وجوهم كي
البلّار وعلى العلم والثقافة اللي خارجة سواقي من عيونهم، وبدوا حديثهم
بالعمايل اللي عملوها في تونس...وقت اللي دخلوا في ارضنا واستعمرونا بحجّة
اللي احنا بربر وهوما اللي باش يردونا متحضرين ومثقفين ويخرجونا من التخلّف
والمزيريا...ومن بعد كي قلنالهم نحبوا الاستقلال الذاتي للبلاد...زيهم زي
الفالحين هزوا رواحهم وخرجوا وخلونا ناقصين تحضر ومازلنا متخلفين،ماصدقوا
سمعوها بعد ما نهبوا لبلاد،ياخويا ياخي مانفدلكوش...تي كي انتم رجال بقيتوا
شوية كملتولنا التحضر...انتم صرفتوا صرفتوا والا اعطونا فترة نجربوا فيها
واذا ماعجبناش الجوّ ،ارجعوا وماصار شئ نقعدوا وخيّان...علاش طفيتونا وعلاش
النبزيات؟ توّا باهي هكّة تبعثولنا في العوانس متاعكم وعزايزكم يعرسوا
بولادنا ويجوا التوريست يحوسوا كيما يحبّوا امّا نحنا باش نمشوا لا؟ آش
عملنا وجاء مليح؟ ضربنا الكبّي والميزيريا وبدينا نمشولكم في فلايك
لوح...ياولد العكري راك محسوب حبيبنا وكلينا خبز معا بعضنا وحاربنا
معاكم،علاش تجونا ونحنا مانمشولكمش؟ علاش تهزوا في خشومكم علينا علاش نحنا
التوانسة ''نو''....
هذا كلام الجماعة نقلت ليكم بالحرف الواحد ومانكذبش
عليكم عملت جهدي باش نغير لولاد الحومة التفكير العقيم متاعم بحكم اني
غيور على ارض جدادي اما شئ مانجمتش.
فمّا حاجة اخرى نمتاز بيها،
العبدلله مستعد نكتب الشعر ونمدح وعندي اديّات خفاف في التطبيل والتبندير
خمسة سنوات خبرة فيراج ونداوم في التصفيق سبعة ايام وسبعة ليالي وعندي
الميئات من العضويات في المنتديات باش نتصدى لكل من ينقد تونس وينبّر
عليها...
ومستعد نلبس البدلات الايطالية وربطات العنق الايطالية ونحلق
"الموستاش" لاشرفكم في كلّ ندوة واجتماع ونضحي من اجلكم بالعمل التطوعي في
اوقات الفراغ ونجيبلكم اسماء الشبيبة اللي هاربة من الخدمة
الاجبارية،الوطنيّة.

الإمضاء : ولدكم البار،المواطن الصّالح...في
خدمة بلدي تونس.



طبعا لست انا...بل شرذمة بات عددها في
تزايد ونسأل الله الثّبات