سي نورمال كي تخطرلي... وفي تونيزيا سات نفجّر روحي

نحب نحكيلكم على خوكم الحنشّ متخرج عندو 3 سنين وتحصل بعد مسيرة دراسية موفقة على شهادة استاذية وبالرغم اللي السيّد هذا كان قرّاي ومعدلاتو طيّارة الا انو ماعندوش البخت ولا حيطيست يعمل ستّة وستين كيف...
الايام تتعدى وشئ ما تغيّر...كيما العادة فاق الحنش يمشي للسبّالة ويغسل وجهو بالصابون المعطّر ويثبت في شعرو فمّاش شيبة طلعت جديدة...بالرغم ملي عمرو صغير ومازال شباب الا انو شاب...والشيب مركا ضربة جزاء في الدقيقة 80 وماعادش وقت للتعديل...يعمل شويّة جال يركح بيهم شعراتو ويرجع للغرفة متاعو يقعد على البيرو ويحل الاورديناتور


ملّي كلاها في عظامو وضرب البطالة وحياة الحنش مقسمة بين القعاد على التروتوار قدام بيرو الشغل وبين الانترنات ولعشية يعمل كاس تاي في قهوة الحومة يوسع في بالو مع اصحاب الحيط...
المهم مانطولش عليكم اول ما حلّ منتدى تونيزياسات وعمل طلّة على العام وخربش شوية هراء في هداري انسايدر واطمن على الجماعة ومن بعد تعدى بحذى خوه الباتشينو وبولو يبربش على الكونكورات...حل الاذاعات وماخلى لا موزاييك لا الشباب ولا الجوهرة ولا صفاقص...شئ ما لقى كان شوية برامج متاع برجك اليوم وباش تلتقي بحبيب القلب وفلوس باش تجيك ليوم وتليفونات تصبّ صبان تلوك في خرّافة غناية البلطي وصور لبنات وفلمات ودرابوات وخرفي يا مباركة...
ضربه الكساد والقلق وقرر باش يحل شوية فن من الاورديناتور على كيفو خير ما تجيه جلطة ترزيه في عمرو...


وبالطبيعة من غير ما ينسى الفايسبوك ماهو من مديدة عمل كونت وقرر باش يبحث عن فتاة احلام اروبية فماّش ما تخرجو لبرّة ويرتاح من البطالة ،طبعا تعرفوا ان اغلب الشباب هذا هو هدفهم من الانترنيت



الشباب يا غالي شاب وماعاد يحتمل الاوجاع
مع تسهيلات التوب نات هرب الى الانترنات
واصبح يمضي الساعات يتكلم ويعبّر من وراء الزجاج
بعد ان ضاقت بهم دور الشباب و المنابر والساحات
يبحث عن فتاة الاحلام من بلد العكري والعم سام
شباب همّه البحث عن عمل او الحرقة على الانترنات
بعد ان يئسوا من ايجاد السبيل

فما وجدوا الا الانترنيت طريقا والشات بديلا ودليلا...
فما عليك الا بلوقا او بروفيلا
زينه بصور او ان شئت تسجيلا
تجد نفسك في المباشر مع اجمل فتيات العالم حسنا وتمثيلا
من اقصى بلاد العزّاب الى بلد العم سام
انك امام الكام
عين سحرية تحقق الاحلام
لذا استغل الفرصة ولا تكثر من عبارات اللول والوزّ
فانها تعبير عن شعور حائر ومهتزّ
وظرفّ بائس وملتزّ

الانترنت تعبد عبدا ومن دون صلاة
بل جعلت الليل معاشا والنهار سبات
الشاتور...انسان بسيط وليس بصعلوك
ولكن البطالة وصعوبة الزواج في بلاده
جعلته تائها في بحر البادو والسكايبي والسكايروك
اخذ الشات من الذكور كما اخذ من البنات
فاذا كان غرض الذكور منه اروبا
فماهو غرض البنات؟؟؟

اما الشئ اللي يحشّم في الفايس بوك انو الشعب التونسي وصل لدرجة كبيرة من الوعي وخاصة مع تهاطل الاستدعاءَات على الحنش باش ينظم لمجموعات وقروبات ينشؤا فيهم كمشة فروخ بحجة التحرر والحرية ومحبي الزطلة والتوقير وبربي نلقاش عندك ميّا والا سيقارو...
برجولية غلبو على خوكم الحنش هالفروخ وبالرغم من حجب قروباتهم الا انهم شئ ماحبوش يفهمو رواحهم...
على فكرة انو الحنش من المعارضين لسياسة الحجب ويكره عمّار ككرهه لبني صهيون...يا خويا علاش اش عمل الشعب باش تدزّ عليه بالحجب؟؟؟ بالك جاي يساسي فيك...سايس خوك...


وخلّي عاد من الالعاب والخزعبلات اللي شطر الفايسبوكين التوانسة مشاركين فيها ولعلّ اهمّ حاجة جبدت انتباه لحنش لعبة "الفارم فيل" اللي تزرع فيها الفقوس والبطيخ والطماطم...وربما هذا السبب اللي خلى شبابنا يهرب من الفلاحة بارضنا ويشد فلاحة الانترنيت...شئ يدوّخ...كان الدنيا دنيا راهو حققنا الاكتفاء الذاتي في الخضروات موش نهربو في البطاطا من ليبيا والجزائر


آخر طلعة قبل بنهرات فمّا واحد من الجبورة بعث جواب فايسبوكي للحنش يدعوه باش يخربش ضمن مجموعة من حاملي القنابل الموقوتة وصواريخ سكوت ورشاشات كلاشنكوف قال شنوا يناصرو في الاسلام ويجاهدو افتراضيّا...المشكلة انو الحنش خاطيه الحكايات هذي وخاصة كيف تكون اغلب ركائزها بدع واكاذيب من قبيل اللي مايسوكّش كل يوم مايدخلش الجنة واللي يضرب كافر حتى ماعمل شئ يجازيه الله بالجنّة...
فرد عليهم الحنش بجواب مضمون الوصول :

السلام عليكم ورحمة الله
مانيش باش نسألك كيفاش من دون خلق ربّي الكل ما خطرلك كان انا باش نساهم معاكم في كوخكم الافتراضي للجهاد...اما يارسول الله كي انت تنادي بالجهاد المسلح ياخويا سيّب الفايس بوك للي يجاهدو بالقلم لنشر الاسلام وتوعية الناس وبرّا ادخل اللخلا وجاهد!!!ملا حالة و ملى ميزيرية كلبة...توى هذا آش عطاك مخّك؟؟؟ بالله قولي ريتش مرّة نصراني والا ايهودي يعمل في عمايل كيفك؟؟؟ وكي انت تحسب في روحك متديّن وغيور على الاسلام قلّي آآآش تعمل تصويرة المرا اللي شطرها عريان في قائمة الاصدقاء؟؟؟ تجاهد والاّ تكوّر وترّكح بالصدر؟؟؟
بصراحة الشفاعة يارسول الله...بجاه ربّي ياصاحبي راهو الشئ هذا ماقالش بيه ربّي وكي تحب تجاهد افتراضيا ونعاونك باللي نقدر عليه من مقالات سيّب عليك من الاسلاموفوبيا وبرّا خويا حلّ قروب حطّ فيه ايات قرآنية واحاديث نبوية وشوية خطب توعي بيها الناس موش تدخلهم في حيط بشوية خزعبلات...
وكان ماعجبكش كلامي نتمنى انك ماتتهورش وتتطرشقلنا في الفايسبوك...براس الحنينة اتفجّر بعيد...
والسلام.


هكّا كل يوم يتعدى في الانترنات يشوف فيه وخيكم الحنش العجب...
يتصدم ويضربا الهم...
على عمار وجماعة فجّرني اللي فضحونا بين الامم...
وقاللكم خلّي نمشي نرقد ونتخمد...
سي نورمال كي تخطرلي...
وفي تونيزيا سات نفجّر روحي...

فريب وخنّار...والعيشة فلّ...

مايفيد ملام...

مايفيد كلام...

مادايم والو...

مادايم كان وجه ربّي...


يا حسرة على عيشت البلاد...بعد الحنّ والعزّ والصحبة...توا في شمبر وحدو...قاعد على الاورديناتور...ترشّف رشفة من القهوة الكحلة...هزّ راسو للعالي...تذكر عيشتو في تونس...

الايّام الكلّ كيف كيف...يبدأ الاسبوع من نهار الاثنين حتى للسبت ونفس البرنامج...الصباح في بيرو الشغل والقايلة وفي الليل في تونيزيا سات والعشويات في القهوة...حتى نهار الاحد عادي ونفس لحكاية بالنسبة لخوكم الحنّش...
يقوم مفجوع من صوت الموبيلات متاع الكوشة اللي توصّل في الخبز للعطارة...وتزيد تخلط عليه موبيلات اللقّام....لآآآآآقمي.... مبعد يتعدى اللي يبيع في الفريب....فرييييييييييب....لا حول ولاقوّة الا بالله...يجبد خوكم الحنّش سيقارو كريستال معوّج ويتكيفو على الخوا...
ايه وبياع الماعون،شبييه لتوا ما جاء...هاهو جاء...يالي عندو حوايج قديمة...يالي يحب يبدّل، يسمع باب دار حلّومة اللّبة يتحلّ،صوتو يفيّق الموته في الجبّانة...كيمة العادة يمكن مخرجتلو صبّاط قديم باش تبدلو ببانو والّا كيسان بلّار...
الهمّ لزرق...الواحد معاش منجّم يرقد في هالبلاد...اما اكاهو الخبزة مرّة...
آش باش تعمل يا حنّش...آش باش تعمل...هيا برّا للسوق،اليوم احد مايقرأ حد راهي حافلة لبلاد...يوصل للسوق اما كان قعد في الحومة خير...نفس الحكاية هرج وصياح وسبّان...فريييييب ،القطعة بدينار ...بلآآآار....وموكروفون في الجلغة وتعالي يا مادام اشري البلار...
وحتى المارشي هذا ينادي منه ولاخر من غادي...حووووت الكيلو بالفين، يازوالي وكلّ صغيراتك...فقووووس...طمآآطم....
عمل الحنش دورة صغيرة وخرج من الباب الثاني للمرشي...يلقى بياع الملسوقة وطفلة تبيع في خبز الطابونة ...يا صاحبي بالحق الخبزة صعيبة ومرّة ،الناس الكل تعاني...قال برة نعمل قهوة وسويقرات نعدّل بيهم مخيّ ...دخل لقهوة وشدّ بليصة تعمل الكيف...يشوف في السرفور جاي شاد في يدو طبق مليان بالقهاوي ويحطها على الطاولة اللي بجنبو...يا حسن اشنوا ديما ناسي الماء؟؟...يجاوب السرفور على الحريف بكلمة زايدة قد راسو...يعطيك....ويزيد الحريف مايسكتش ويرد السب...يعطيك....على....في....يا...
يا والله احوال...يستلبس خوكم لحنش ويقرر باش يبدل القهوة ،الجماعة تحكي من الحزام اللوطة...
يتعدى على قهيوة يشوف فيها جماعة الجوكينغات...ايه ماله هاذوما يا سيدي للميعرفهمش جماعة البيروات والمتوظفين والناس اللي لاباس عليهم...
يشد طاولة ويبقى يشوف في عجب ربّي...المشكلة انو في بلدان ربّي الكل...الزي الرياضي يتلبس لممارسة الرياضة الا في بلاد الفرح الدايم ولا زي متاع شيشة وقهوة...وخلّي عاد من الحكايات اللي يحكو فيها...كلها على سكرة البارح وكل واحد يفتخر وين عمل كعبات البيرة في السامدي سوار...
يتلفت الحنّش على اليسار يشوف جماعة شادين جرايد...يثبت مليح يلقاها الكل لابراس...لا حول الله...حتى هي تابعة الزي متاع القهوة...
ملّا حالة مكربة وملّا عيشة...الواحد تقولش عليه عايش في زوز بلدان...ميزيرية وفريب....مظاهر وتبهبير
رجع الحنّش للدار...حلّ الانترنيت...وبدا يخربش على هالخنّار...

هذي هي بلادي...اما والله فريب ومقرونة ومعدنوس....نصف خبزة طابونة في بلادك ولا خبزة في بلاد الناس

أعشق عمري لأني إذا مت ، أخجل من دمع أمي

مرحبا بالاحبّة...

في عيد الام اكتب كلمات منثورات...تقاطرت معها دموع قلبي...
يكذب عليك في هذه الدنيا ان قيل لك ان هناك شئ اثمن من والديك...وخاصة الام...هي حملت بي...هي ولدتني...هي ربتني...
الام نعمة من عند المولى...
حقيقة لا اقدر على الكتابة رغم ان صورة امي على المكتب امامي...لاول مرّة يخذلني القلم...ربما حالة الاغتراب...ربما اشتياق لا اقدر ان اخفيه او اظهاره...
نجري وراء الدنيا وتركنا امهاتنا...ندرس ونشتغل ونتزوج ونبتعد ونتركها...نتذكرها فنهرول لارسال بعض الملاليم مصحوبة بخجل وندم...نهاتفها بضع دقائق...نزورها عندما تمرض ونمضي بحجّة ان الدنيا صعبة والخبزة مرّة...
لو كان ماتت ندفنها ونبكيها اياما معدودات...
فقولوا لي...من منكم لم يغضبها يوما؟ من منكم لم يصيح في وجه امّه؟ من منكم لم يبكيها في مواقف؟
لا تقولوا لي انكم ملاك ابيض...
انا اخطأت كثيرا معها فادعوا المغفرة من الله...وختمتها بتركها والسفر...
تحية لامي ولكل ام...


الولدة تبعث وتقولي لوحتني يا ضنيني
لا فاد عطفي ولا حنّي

لا نسيت لا لوحتك...يمكن نكون صحيح ماريحت
ويمكن نكون في غيبتي جرحتك
ويمكن ماني قريب ما متهني
بيني وبينك في خاطري نندهلك
يــــــــــا رب ريح بالها طمنّي
يــــــــــا رب زيد في عمرها وارعاها
باش نرجع وتحس ام الحنْ بحنّي..
ليّام ما بتصدف الا برضاها
عاث الزمن بيا وزاد ظلمني

لا تظلميني يمّة..
لا تظلميني يمّة ولا تعيشيني في مهالك ظلمة
يشهد عليا الله واسع علمه..آش داسلك في القلب وآش متمني
ياسر عليا الوقت..وانتي وظنّي
ياسر عليا هكّة..ياسر عليا هكّة..
ظلم الوقت ودروبي خطت السكّة
لي قلب من داخل كلاته حكّة ولا نقد حكّه ولا دواء ذهنّي
طامع رضاك عليا وبرضاك بركه ننجا
آآآآآآه يامّة...ارضي عليا يمّة

محروم منّة ومنّة والله محروم
ولدك سلك دروب ما رحمتني...
آآشلزني نطيّش غِطايا الدافي وحدفت روحي للصقيع كبّلني

ســــــامحيني يمّة...مكتــــــوب يمّة
هربت من كساد بلادي...فديت من الشمايت والبطالة تغنّي
وفي اللخر راني مجبور ماني عادي شديت جرٌت الرحيل هزمني
غيراصبري يمّة...وماتقولي
الصبر ديما يساندك في همّك
اني عارف هولك نتيجت هولي
اخطاك من كثر النكد واوجاعا
اصبري غاليتي ويـــــــــارب تعطيني على قد نيتي
تتعدى ايام البعد ويـــــــــارب تعطيني على قد نيتي
يـــــــــــارب عــــــــــــاوني
وبارك خطايا بشورها عاويني
يكون حن والدتي منارة للثنّية
اخر طريقي رضاك يا غاليّة

والله يمّة من المكتوب ماهو منّي

انا من سلالة المنقرضين

انا من سلالة المنقرضين...


نحن العرب قوم بائس مهدد بانقراض...فأنا كبائس من النوع الرفيع فهمت انني منقرض لمحالة،لست ديناصورا ولكّني عربيّ كتب على جبينه...اصمت واركع ولا تتكلم فانت بائس...
احيانا اتساءل...لماذا لا يتمّ قبرنا جماعيا وانتهى الامر...فهكذا سيوفر هولاء الناس ثمن الوقود والذخائر والقنابل التي يشترونها ويصنعونها...
ولكن...لو انقرض العرب فمن سيلعب ويعوض دور البائس في تراجيديا العالم؟...
على من سيشفق وعلى من سيتأسى؟
على من ستطبق القوانين والتجارب العسكرية؟
اظنّ ان هؤلاء يعلمون اننا امّة منقرضة لا محالة فلا يهمّ ان حوصرت غزّة او قذفت على رؤوس الفلسطينين الاف الاطنان من القنابل الفسفورية...
الان حلّ علينا موسم غزّة...ولكن هذه السنة جاء خافتا لم يقتل فيه سوى العشرات...
فامريكا اعيتها الحروب وانقت الكثير على غزواتها...واسرائيل تحاصر وتعرف انها هكذا تقتل بدون خسائر...ومصر تبني جدارها وتنافق من اجل توفير الفول والطعميّة لشعبها الفقير...والخليجيون اعينهم احمرّت وتعبت من الجلوس وراء الحواسيب والتلفزات لمتابعة اسعار واسهم النفط والشركات...اما المغرب العربي فهو غارق في الكرة والغناء...
الاخبار معتادة...
فنان يغني على غزّة وروتانا تجني الاموال...
قمّة عربية طارئة...
قروب على الفايسبوك يدعوا لجمع مليون توقيع للتنديد...


راودني سؤال...

ماذا لو انقرض العرب وسحقوا عن بكرة ابيهم؟؟؟

لا شئ...لاننا في الحقيقة منقرضون!!!!

اشحذوا سيوفكم يا صعاليك...او هاتوا إليَّ اشعاركم تختالُ في عين القمرْ

هيّا قلنا السلام عليكم...




لعّل بعض الظروف تجعنا احيانا لا ننتج الا الهراء ونخطّ سخافات هي اقرب للهذيان...
في ساعات الفجر...ارجوا ان تتسع صدوركم لخربشات من عهد الجاهليّة...

تذكرت مسلسل قصّته حول حياة الصعاليك...الصورة ضبابية في مخيلتي ولكن قارنت وضع شعوبنا فوجدت اننا صعاليك ولما لا قد اكون الشنفرى الأزدي او تأبط شراً وانت شضاض الضبي التميمي اوعروة بن الورد...ودولنا هي بمثابة قبائلنا...
طبعا المعروف عن الصعلوك هو انه انسان فقير،ثائر،رافض للظلم،شريد ومنبوذ من قبيلته لانه لا يعترف بسلطة القبيلة وواجباتها (خارج عن القانون : بالوصف المعاصر) وصعاليك الجاهلية امتهنوا غزو القبائل بقصد الاخذ من الاغنياء وإعطاء المنبوذين أو الفقراء...
اما صعاليك الحاضر لا يجتمعوا مع صعاليك الجاهلية الا في الفقر ،فنحن اي معشر الصعاليك لانثورون ولا نرفض ولا ندد ولا نقوى حتى على الكلام...فقط صعاليك منوّمين لا نستيقض الا في الملاعب ورغم جوعنا وغلاء معيشتنا فنحن في صمتنا غارقون اي صعاليك هادئة...
لن اكون غليظ القلب ولن اظلم الصعاليك المعاصرين فهم صابرين على ظلم القبيلة رغم علمهم باساليب المستكرشين من رشوة وسرقة ونهب وهذا ما ذكرني بأبي خراش الهذلي القائل :‏

وإني لأثوي الجوع حتى يملني‏
فيذهب لم يدنس ثيابي و لاجرمي‏
وأغتبق الماء القراح فأنتهي‏
إذا الزاد أمسى للمز لج ذا طعم‏
أرد شجاع البطن قد تعلمينه‏
وأوثر غيري من عيالك بالطعم‏
مخافة أن أحيا برغم و ذلة‏
وللموت خير من حياة على رغم‏

فهو الصابر على الجوح و يكفيه الماء الصافي بينما يصاب كل من حوله من أشحاء النفوس بتخمة الطعام، وإذا ما وجد الطعام فضل إطعامه لغيره و يعني هنا أولاده دون أن يمسه ،وكل ما يعمله من أجل ألا يوصم بالعار و المذلة .‏


هذه هي سياسات الدول العربيّة...معادلة قبيحة تقوم على تجوّيع الشعوب ليتوقف التفكير عند كيفيّة الحصول على لقمة العيش...والبحث عن ما يملأ البطون وتمرّ السنين وتسقط السراويل وتستبدل الاحزمة بمعاصم الساعات وتنتفخ كروش اصحاب البدلات الايطالية وهكذا دواليك...


اشحذوا سيوفكم يا صعاليك...او هاتوا إليَّ اشعاركم تختالُ في عين القمرْ

ويبقى حديثنا قياس وسلامي عليكم يا اعزّ النّاس

للبيع...اشري تربح

انا الممضي اسفله:



انا مواطن
عندي خبرة في التنسنيس ونقل الكلام اسرع من الارساليات القصيرة وعندي مواهب
كبيرة وقدرات عجيبة وافكار شيطانية حاصل على باكالوريا في التلوعيب
ومتخّرج من كلّية الدوّة الفارغة ومتمرّس في هزّان القفّة،ورثت عن جدّتي
التكمبين والتقطيع والترييش.
نكتب مليح ونخربش كل حين، مستعد نسّخر قلمي
لنقل اخبار المواطنين وكشف اسرارهم الشخصّية وتحركاتهم ،كجارنا الحيطيسّت
اللي نهار الكل وهو شاد حيوط الحومة يسب وتشكى من المسؤولين ويتهمهم بانهم
السبب في بطالته بعد التخرج والا الاوباش اللي يجتمعوا كل ليلة في قهوة
''سلّم نفسك '' ويبدوا ينبّروا على اسوام المواد الغذائية وعلى عدم دعمها
من الدولة وخلّي عاد من عمّار الحمّاص...هذا قاللهم اسكتوا...كل ما نشري
باكو فرملي باش نحرق بيه جواجيا يجبدلي على مشكل السكن...توّا هذا معقول؟!
يحب الدولة تسيّب المنتخب الوطني لكرة القدم وتتلاها بيه هو باش تسكنا؟؟؟
وزيد على هذا الكل اني نعرف اللي هو كذّاب كبير...الانسان هذا عنده خمس
سنين ساكن عند حماته خدّوجة اللفعة.
والشبيبة متاع الحومة نظنهم
يتعاونوا مع فرنسا يحبوا يرجعوا الاستعمار فمّا مرّة وانا نتفرج على طرح
شكبّة في القهوة سمعتهم يحكوا على فرنسا وبانبهارهم بناسها اللي وجوهم كي
البلّار وعلى العلم والثقافة اللي خارجة سواقي من عيونهم، وبدوا حديثهم
بالعمايل اللي عملوها في تونس...وقت اللي دخلوا في ارضنا واستعمرونا بحجّة
اللي احنا بربر وهوما اللي باش يردونا متحضرين ومثقفين ويخرجونا من التخلّف
والمزيريا...ومن بعد كي قلنالهم نحبوا الاستقلال الذاتي للبلاد...زيهم زي
الفالحين هزوا رواحهم وخرجوا وخلونا ناقصين تحضر ومازلنا متخلفين،ماصدقوا
سمعوها بعد ما نهبوا لبلاد،ياخويا ياخي مانفدلكوش...تي كي انتم رجال بقيتوا
شوية كملتولنا التحضر...انتم صرفتوا صرفتوا والا اعطونا فترة نجربوا فيها
واذا ماعجبناش الجوّ ،ارجعوا وماصار شئ نقعدوا وخيّان...علاش طفيتونا وعلاش
النبزيات؟ توّا باهي هكّة تبعثولنا في العوانس متاعكم وعزايزكم يعرسوا
بولادنا ويجوا التوريست يحوسوا كيما يحبّوا امّا نحنا باش نمشوا لا؟ آش
عملنا وجاء مليح؟ ضربنا الكبّي والميزيريا وبدينا نمشولكم في فلايك
لوح...ياولد العكري راك محسوب حبيبنا وكلينا خبز معا بعضنا وحاربنا
معاكم،علاش تجونا ونحنا مانمشولكمش؟ علاش تهزوا في خشومكم علينا علاش نحنا
التوانسة ''نو''....
هذا كلام الجماعة نقلت ليكم بالحرف الواحد ومانكذبش
عليكم عملت جهدي باش نغير لولاد الحومة التفكير العقيم متاعم بحكم اني
غيور على ارض جدادي اما شئ مانجمتش.
فمّا حاجة اخرى نمتاز بيها،
العبدلله مستعد نكتب الشعر ونمدح وعندي اديّات خفاف في التطبيل والتبندير
خمسة سنوات خبرة فيراج ونداوم في التصفيق سبعة ايام وسبعة ليالي وعندي
الميئات من العضويات في المنتديات باش نتصدى لكل من ينقد تونس وينبّر
عليها...
ومستعد نلبس البدلات الايطالية وربطات العنق الايطالية ونحلق
"الموستاش" لاشرفكم في كلّ ندوة واجتماع ونضحي من اجلكم بالعمل التطوعي في
اوقات الفراغ ونجيبلكم اسماء الشبيبة اللي هاربة من الخدمة
الاجبارية،الوطنيّة.

الإمضاء : ولدكم البار،المواطن الصّالح...في
خدمة بلدي تونس.



طبعا لست انا...بل شرذمة بات عددها في
تزايد ونسأل الله الثّبات

تونس بلد صناعي...صناعة التروتوارات والحيوط والبوطوات

كلما فتح موضوع عن البطالة الاّ وانهالت عليه ردود لا يسعني
الا ان اقول عليها انها سطحيّة...من قبيل البطالة موجودة في كلّ دول العالم
وكان البقية لا يعرفون ذلك!!.
واليوم اعلن ان سوق العمل في تونس مفتوحة على
مصرعيها ولا وجود لبطالة فكل الشباب يستطيع الحصول على عمل...
ومن هذا الصرح العظيم اوجّه تحيّة خاصة لكل مسؤولي التشغيل في بلادنا
كعربون محبّة للمجهودات الكبيرة التي يبذلونها ولنظرتهم
الاستباقية الحكيمة لواقع الشباب التونسي وطموحاته المستقبلية...
كيف لا اشكرهم وانا الذي شهد على الاستثمارات المالية الضخمة التي خصصت من
اجل بعث المشاريع الكبرى على حواف التروتوارات والمؤسسات التي انشأت من
احجار الحيوط والبوطوات وكل الإمكانيات متوفرة ووسائل الإنتاج كذلك متوفرة
في الأرصفة فلا ينقص إلا اليد العاملة.

ولهذا ولكي لا تذهب مجهودات مسؤولينا في مهبّ الريح وبالتالي نظلمها ونظلم
انفسنا اوجّه دعوة ملحّة واكيدة لكل شباب تونس من البطّالة والحيطيسيين
للتقدم للعمل والبحث عن تروتوار او حيط او بوطو للاستثمار فيه وانبه لظرورة
عمل دراسة مفصّلة وشاملة للمشروع وحسن اختيار مكان التروتوار لان المكان
يمثل عامل اساسي لنجاح المؤسسة فمثلا ان يكون بالقرب من مكان يرتاده الناس
بكثرة و يكثر فيها الازدحام على غرار المقاهي والمواخير والحانات لكي يضمن
المستثمر العنصر الاساسي للكسب المتمثل في الزبائن وبالتاري رواج للسلع
المصنّعة.

بعد الانتهاء من مرحلة اختيار المكان المناسب وجب على كل شاب تونسي التقدم
بمطلب للمسؤولين وتقديم مطلبه مرفق بالوثائق اللازمة وطابع جبائي الذي يحمل
صورة بندير ولسان يلعق حذاء (وهذا الطابع له خطائص ومميزات عجيبة تتمثل
فيمنحك بعض الامتيازات كتشجيع للمسثمرين كالمحسوبية تمكن من تجاوز العديد
من العقبات وإعطاء صاحبه ما ليس له به حق في وقت قصير او الرشوة لتسهيل
الاجراءَات)...

وبعد انتهاء كلّ هذه المراحل فاخوك يهنأك بدخولك لعالم المال
والاعمال لذلك يجب ان يكون مضهرك مناسبا وان ترتدي بدلة ايطالية وربطة عنق
انيقة وان تتعطر باغلى العطور البارسيّة ليتم قبولك عندما تريد مقابلة
لمسؤولين وان تشتري حقيبة رجل اعمال واذكّر وانصص الى انّ حقيبة رجال
الاعمال التونسيين تختلف عن البقّية فهنا يجب ان تكون ''قفّة '' اصليّة
ليسهل عليك حمل ما شئت ومن المحبذ ان تستعمل ورق الجرائد لتغطية محتواها
وبعد ذلك اتصل بحدّاد او نجار ليصنع لك عصيّا لحماية التروتوار او الحيط
الذي تقيم عليه مشروعك فالعصي بمثابة التامين الذي تفرضه الدولة علي
الشركات عن طريق شركات الحراسة ذات الخبرة العالية.

وبعد هذه النصائح اغلق عيناك وافتحهما وستجد نفسك رجل اعمال تونسي ناجح
وستمتلا جيوبك بالمال بعد ان كانت مملوءة بتبغ السجائر...لذلك على كل راغب
في العمل ها قد جاءتك فرصة العمر فما عليك الا البحث عن التروتوار او الحيط
او البوطو المناسب قبل استحواذ الغير عليه وأأكد لكم ان مسؤولينا سيقومون
ببناء مزيد من الترتوارات والحيوط ولما لا ان نجد جدران وبوطوات شاهقة
وعملاقة على غرار برج دبي التي ستساهم في رقيّ وتطور الصناعة بتونس وتصبح
قبلة لليد العاملة الاروبية.

فبعد كل هذا...اقول لكم نحن لا نعاني من البطالة...نحن
بلد صناعي...صناعة التروتوارات والحيوط والبوطوات...

على بركة الله